Siglir tar il cuntegn

Header

cuntegn

Svizra Unia crititgescha cassas d'autoservetsch

Las cassas d'autoservetsch en supermartgads fan dapli lavur al persunal, quai mussia in studi da l'Universitad Berna, fatgs sin incumbensa dal sindicat Unia.

  • Tenor studi han ils emploiads da far dapli en pli curt temp, per exempel cun controllas e survegliar, cun lur scolaziun n'haja quai dentant da far nagut.
  • Savens sajan las emploiadas unfrendas d'in sa cuntegnair agressiv da clients.
  • Perquai pretenda l'Unia meglras cundiziuns da lavur.

Gudogn per egualitad da pajas

Er en il commerzi en detagl duai la digitalisaziun vegnir furmada a moda sociala. Perquai pretenda l'Unia meglras cundiziuns da lavur e pajas segiras per l'existenza. Tenor il studi gudognan dunnas per part massivamain pli pauc che lur collegas masculins. En la branscha nua che pli bleras dunnas lavuran saja perquai impurtant da metter en ils daners da la digitalisaziun en las pajas egualas per las dunnas. Coop e Migros duain ir ordavant cun bun exempel. L'introducziun dals sistems da cassas na possia sut naginas circumstanzas manar ad ina reducziun da plazzas.

Clients agressivs

Las consquenzas da las cassas d'autoservetsch sajan gravantas. Las cassas chaschunian perfin dapli lavur als emploiads. Las vendidras hajan da far adina dapli cun controllas e surveglianza e stoppian er anc sa dar giu cun clients agressivs. Ils emploiads n'hajan dentant gì nagina scolaziun en questa partiziun.

Il star en pais per lung temp saja plinavant fitg grev per il corp. Perquai pretenda l'Unia ch'i dettia be pli servetschs da trais uras empè dad otg.

Dus terzs èn dunnas

Las cundiziuns da lavur sajan plinavant fitg precaras perquai che las pretensiuns d'esser flexibels u er perspectivas da professiun manchian. Perquai pretenda la Unia er plans da lavur che sajan planisablels almain 14 dis ordavant.

Radund dus terzs dals lavurers en il commerzi en detagl èn dunnas. Er tar las plazzas parzialas lavurian pli bleras dunnas.

En tut datti radund 4'000 cassas d'autoservetsch tar la Migros ed il Coop. Quellas genereschan radund 20% fin 40% da la svieuta. Il medem mument spargnan las fatschentas tenor il studi custs da persunal, perquai ch'il dumber è sa sminuì cuntinuadamain dapi ils onns 90. Tenor il studi lavuran 240'000 persunas en plazzas cumplainas en la branscha. 323'000 lavuran parzial.

RR novitads 12:00

Artitgels legids il pli savens