Intginas cifras ord la carriera da Seraina Hofbauer
- 14 stagiuns en il tricot da Piranha Cuira
- 7 titels da campiun svizzer cun Piranha Cuira
- 3 titels en la Cuppa Svizra cun Piranha Cuira
- Campiunessa mundiala cun la naziunala svizra U19 il 2008
- 5 medaglias (2 giadas argient e 3 giadas bronz) a campiunadis mundials
Seraina Hofbauer, ussa suenter dus dis, co valitescha ella quest triumf?
Quai è simplamain extrem grond per l'unihockey e per il sport e per quellas dunnas che han gudagnà quest titel. Quai è propi, gea franc per tuttas il pli grond success ch'ellas avevan en l'entira carriera. Quai è ina fitg gronda valur.
Manegia ella che questa victoria vegn era a dar in pusch supplementar en il sport d'unihockey da las dunnas en Svizra u en il Grischun?
Gea, quai è franc ina gronda schanza per il sport. Ed jau crai simplamain che Swissunihockey ha ussa ina fitg gronda lavur da mussar: «Hey, nus avain l'equipa pli ferma, nus essan fermas ed nus vulain far enavant uschè.» Quai n'era betg in «Eintagsfliege». Quai va vinavant uschè. Ma quai è franc impurtant – quel focus è ussa sin il sport unihockey, sin questa squadra naziunala da las dunnas, ed ussa ston els simplamain far las dretgas chaussas. Cun quai, gea.
En la squadra naziunala da las dunnas eran quest onn quatter giugadras grischunas. Ha ella gia gì contact cun ellas? Per exempel cun la golia, Lara Heini, cun tgi ch'ella ha era giugà ensemen en la naziunala?
Gea, jau aveva bler contact cun Lara Heini e cun Chiara Gredig. Cun quellas duas hai jau era giugà in per onns. E quai èn fitg bunas camaratas anc adina. Jau hai era vesì ellas curt avant l'entschatta dal campiunadi mundial. Ed ellas han era raquintà ch'ellas han in extrem bun spiert da team. Ellas han raquintà co ch'igl è en quella squadra ed jau hai pensà, quai è franc in fitg grond avantatg. E suenter en il final – quai era propi legher – han tuttas duas separadamain scrit a mai: «Seraina, tge è be capità?» Jau hai be scrit enavos: «Ma tge è capità? Ussa essas campiunessas mundialas, dapli na datti betg da dir.»
Quant impurtant eran lura tut quellas giugadras per quest titel?
La Lara Heini è natiralmain il MVP da quella equipa e dal campiunadi. Jau crai ch'ella era quella giugadra cun la pli gronda influenza durant quel di, quai era gea «narr» quai ch'ella ha tegnì tut. Ed jau stoss era dir, la Chiara Gredig, quella era in'extrema leader ed è propi ida enavant ora ed era la capitania Isabelle Gerig. Ma uschiglio stoss jau propi dir, jau crai ch'igl era propi ina prestaziun dal team che è propi stada extremamain impressiunanta.
Ella sezza n'è mai vegnida campiunessa mundiala, ma ha gudagnà duas giadas argient e trais giadas bronz. Co era ses sentiment, cura ch'igl era cler che las Svizras èn finalmain puspè rivadas da purtar a chasa la victoria dal campiunadi mundial?
Natiralmain la pli gronda part en mes cor era: «Wow, igl è in grond plaschair, surtut per mias camaratas che han dà cun mai.» Quai è natiralmain extrem grond. E suenter eran uschè 5%, che jau hai simplamain pensà: «Ma, nus n'essan mai vegnidas da far quai. Nus avain gudagnà argient e quai era super, ma il punct sin l'i ha tuttina mancà tar nus.»
Seraina Hofbauer, tge giss ella ussa anc a tut quellas mattas che han svess il siemi da giugar ina giada tar la squadra naziunala d'unihockey?
Tge duess ins dir, ins na dastga betg emblidar che quest campiunadi mundial e quest final – quai è mo ina pitschna part da quest entir viadi. Ed il viadi è quai che ha propi la valur. Sin quest viadi dastgan las giugadras ussa esser extremamain loschas. I dat blers auts e bass en uschè ina campagna da 2 onns. Ed jau crai, ins dastga crair che quai n'è betg mo in siemi da realisar, mabain quai po propi esser realitad. E quai po dar extremamain blera motivaziun.