Ina politica agrara persistenta, orientada als purs pitschens e senza tecnologia genetica. Quai pretenda l'iniziativa dal pievel «per la suveranitad alimentara». A Berna han ils iniziants lantschà il cumbat da votaziun.
Ils ultims 30 onns sajan svanids da quai da 35'000 bains purils en Svizra e 100'000 plazzas da lavur en l'agricultura sajan idas a perder. L'iniziativa dal sindicat puril Uniterre vul qua dar cuntrapais.
Scumandar products modifitgads geneticamain
La Confederaziun duai procurar per pretschs da producziun gists ed entradas pli autas per l'agricultura. Ultra da quai duai la dependenza da pavel da l’exteriur vegnir reducida e l'entira producziun indigena duai er il futur renunziar products modifitgads geneticamain. Plinavant duai dar dazis pli auts sin imports da products che na van betg a prà cun ils criteris ecologics e socials da la Svizra.
Custs pli auts
Parlament e Cussegl federal cusseglian da dir na a l'iniziativa. Quella augmentia ils pretschs per ils consuments e bleras pretensiuns sajan gia ademplidas en l'artitgel constituziunal davart la segirtad alimentara, la quala il suveran ha acceptà l’onn passà.
RR novitads 12:00
