Siglir tar il cuntegn

Header

cuntegn

Uniun sindicala svizra Mantegnair plazzas e garantir la paja

Da mantegnair la capacitad da cumpra e plazzas da lavur sajan premissas fundamentalas per mintga strategia da turnar ad in normal mintgadi suenter la crisa da corona. Questas dus facturs sajan il pli impurtant per in program da conjunctura.

Tenor l'Uniun sindicala svizra tutgia la crisa sur tut lavurers cun pajas bassas e medias. Per quels sajan 20% pli pauca paja grev da supportar. Entant saja il dumber da persunas che lavuran tenor lavur curta creschì sin 1,5 milliuns u 25% da las persunas che gudognan, declera il schefeconom Daniel Lampart. Qua sa tractia dentant d'ina stimaziun, damai che blers chantuns n'hajan anc betg pudì tractar tuttas dumondas.

Purtret da Lampart durant ina conferenza da pressa.
Legenda: Daniel Lampart, schefeconom dal SGB. Keystone

Vitiers vegnian relaschadas. Lampart ha declerà ch'i haja dà dapi la fin da mars fin ils 9 d'avrigl 10'000 dischoccupads dapli. Durant autras recessiuns haja dà fin a 4'000 dischoccupads dapli per mais, ha el agiuntà. Relaschads hajan difficultads da chattar novas plazzas, en spezial ils pli vegls.

Relaschar premias e paja cumpletta

Per levgiar la situaziun, propona il SGB che la cassa da malsauns da persunas cun ina paja bassa duai vegnir pajada da la Confederaziun. Plinavant duain persunas vulnerablas vegnir protegidas meglier al plaz da lavur.

Per evitar problems socials e donns pli gronds per l'economia stoppian las pajas vegnir garantidas per 100% scriva l'uniun sindicala. Uschia vegnian ins apunta da mantegnair la capacitad da cumpra da la glieud.

Oravant tut dentant pretenda l'uniun tetgala dals sindicats che persunas vulnerablas vegnian protegidas meglier a la plazza da lavur. Sche quai na saja betg pussaivel, saja il Cussegl federal dumandà da preschentar ina soluziun per che quellas persunas survegnian er sch'i ston star a chasa la paja cumplaina e vegnan protegidas da relaschadas.

RTR novitads 12:00

Artitgels legids il pli savens

Ir a sanester Ir a dretg