Siglir tar il cuntegn

Header

cuntegn

Uniun sindicala svizra Reducir premias enstagl far regals als ritgs

Las chasadas cun entradas bassas e mesaunas pateschan il pli fitg da la crisa da corona, tenor indicaziuns da l’Uniun sindicala svizra. Ella haja uschia cunzunt tutgà quels, che profitavan gia avant strusch d’in augment da las entradas.

Grazia la lavur curta e las ulteriuras garanzias da paja hajan ins bain evità ina catastrofa, ed era la dischoccupaziun sa reduceschia dapi intgins mais – hai gì num da l’Uniun sindicala svizra tar sia conferenza da medias annuala.

Dentant sajan da las persunas sur 60 onns dapli dischoccupadas ch’avant la crisa. Ed er tar ils giuvenils tranter 15 e 24 onns sajan pli blers senza lavur. Vitiers ha il sindicat menziunà che la lavur temporara saja creschida l’onn passà per passa 10%.

Premias creschan, pajas strusch

La chargia tras las premias da la cassa da malsauns èn tenor l’Uniun sindicala svizra per bleras persunas betg pli supportablas. Las pajas sajan dal 2016 fin uss creschidas real sulettamain per 0,2% per onn, pli pauc ch’il svilup economic en quest temp.

Perquai pretenda il sindicat d’adattar la politica da las entradas e da la taglia per las chasadas cun entradas bassas e mesaunas. Enstagl da sbassar las taglias per la classa superiura.

audio
Per tadlar: Curt e cumpact
ord RTR Audio dals 11.01.2022.
laschar ir. Durada: 1 minuta 7 Secundas.

RTR novitads 12:00

Artitgels legids il pli savens

Scrollar a sanestra Scrollar a dretga