In rapport intern rinfatscha maldiever da la pussanza e neopotissem a Pierre Krähenbühl, il secretari general ed ad intgins collavuraturs da l'ovra d'agid UNRWA (United Nations Relief and Works Agency for Palestine Refugees in the Near East). Krähenbühl ha refusà las rinfatschas. Dapi il 2013 è el il directur da l'ovra d'agid.
Squitsch sin UNRWA crescha
La decisiun da la Svizra augmenta vinavant il squitsch sin l'ovra d'agid. L'EDA stat en contact cun auters stadis donaturs. Communablamain veglian ins decider davart eventualas ulteriuras mesiras, uschebaud ch'il resultat da l'inquisiziun è enconuschent. L'UNRWA è en ina situaziun difficila, perquai ch'ils Stadis Unids han er gia sistà lur pajaments.
Er il minister da l'exteriur svizzer, Ignazio Cassis, è sa dumandà la primavaira publicamain, sche l'UNRWA è ina part da la soluziun u ina part dal problem en la dumonda dals fugitivs palestinais. Il medem mument accentuescha l'EDA che l'organisaziun prestia ina lavur impurtanta.
RR novitads 07:00