Siglir tar il cuntegn

Svizra «Upgrade Your Winter» – Optimar l'enviern cun la Svizra

Il motto turistic per l'enviern 2017/18 è «Upgrade Your Winter». Far vacanzas en Svizra saja sco optimar l'enviern, communitgescha Svizra Turissem. Tranter auter cun purschidas schlargiadas.

2 skiunzs en la naiv.
Legenda: Svizra Turissem spetga ina buna stagiun e spera sin bun'aura cun naiv sco qua il 2014 a Mustér. archiv/ANR

Il turnaround tar il turissem en Svizra saja reussì. Suenter che las cifras da giasts èn sa reducidas ils ultims onns hai dà ils mais da stad, tranter il matg ed il settember, in plus da 5,6% tar las pernottaziuns, quel vegnia era a cuntinuar l’enviern proxim, uschia Jürg Schmid il directur da Svizra turissem.

Jürg Schmid avant ina culissa d'enviern da Svizra Turissem.
Legenda: Jürg Schmid ha preschentà per la davosa giada la campagna d'enviern. Adrian Camartin

Curs dal franc svizzer ha gidà

Contribuì a quellas perspectivas legraivlas haja segir era il curs dal franc svizzer a l'euro che saja sa sbassà sin 1,16 francs ils davos mais. Per il turist da la zona da l’euro saja la Svizra cunquai vegnida passa sis pertschient pli favuraivla quest onn, di Jürg Schmid.

Sch’ins resguarda era anc che adina dapli prestaziuns sajan vegnidas integradas en quai pretsch, per exempel Internet gratuit ni era transports entaifer las destinaziuns, e ch’ils pretschs dals hotels sajan era anc vegni sbassads, saja la Svizra oz prest 15 pertschient pli favuraivla che avant trais onns cura che la Banca naziunala svizra ha abolì il curs fix dal franc svizzer a l’euro.

Buna prognosa – dependa mo anc da l'aura

Els spetgian ina buna stagiun d’enviern, ha ditg Schmid, natiralmain dovria era cletg cun l’aura. Era l’offensiva da la branscha sco per exempel il motto «Upgrade Your Ski Day» vegni a gidar. Cun questa acziun pon giasts cun ina carta dal di gia ir sin pista il di avant a partir da las 15:00.

Nov president da Grischun Vacanzas

Jürg Schmid daventa nov president da l'organisaziun da marketing grischuna, Grischun Vacanzas. La fin da quest'emna va ses temp tar Svizra Turissem a fin. En avegnir vegn Jürg Schmid a procurar per novas ideas e schlantsch turistic en il chantun Grischun.

RR novitads 11:00