Siglir tar il cuntegn

Header

cuntegn

Urari 2021 SBB po realisar gronda part dal nov urari

Ils 13 da december vegn fatga la midada da l'urari da la Viafier federala. Singulas purschidas vegnan introducidas cun retard, damai che la crisa da corona ha per part chaschunà che plazzals èn stads serrads. Er tar la scolaziun da novs locomotivists haja dà retards.

Tar il traffic da persunas vegnian las Viafiers federalas dentant da realisar la gronda part dal nov urari, quai ha scrit l'interpresa sezza. Tar questas midadas tutgan dapli e pli sveltas colliaziuns tranter nord e sid sco era ina pli vasta purschida internaziunala a Minca ed en Italia sco era diversas meglieraziuns en il traffic regiunal.

Finiziun da la NEAT suenter 28 onns

Il december vegn en funcziun il tunnel da basa dal Ceneri e lura è terminada la NEAT suenter in temp da construcziun da 28 onns. Ensemen cun la finiziun dal corridor da 4 meters tras la Svizra ha uss il traffic da vitgira er dapli capacitad sin las rodaglias.

Purtret dal tunnel da basa dal Ceneri.
Legenda: Keystone

Retards pervi da crisa da corona

Gia l'emna passada è vegnì enconuschent che la pandemia vegn ad avair in'influenza sin l'urari dal Tessin. Dasper retard sin dus plazzals dal tunnel da basa dal Ceneri, è er s'entardada la scolaziun dals novs locomotivists per la flotta da Tilo. La SBB e la regenza lavuran vid in urari da transitoric. Là nua ch'i dat problems cun l'urari pervi da la pandemia vul la SBB realisar l'urari fin il pli tard ils 5 d'avrigl 2021.

Ord l'archiv:

Artitgels legids il pli savens