A partir dal december datti dus trens directs dapli tranter Cuira e Genevra. La raschun saja che las colliaziuns existentas vegnian appreziadas fitg tar la clientella, communitgan las Viafiers federalas svizras (SBB) cun preschentar las midadas da l'urari. Uschia curseschan la fin d'emna dus trens directs dapli sin il traject Genevra-Turitg-Cuira.
Augmentar las capacitads tras il Gottard
Ultra da quai datti da nov il tact da mes'ura tras il tunnel dal Gottard. Quai vegnia cunzunt dabun als pendularis tranter il Tessin e la Svizra tudestga, sco er als giasts da vacanzas da la Svizra tudestga che van en il sid. Ils trens curseschan en direcziun sid tranter las 06:00 e las 20:00 ed en direcziun nord da las 07:00 e las 22:00 mintga mes'ura.
Pli confortabel e tuttina dapli sezs
Sin plirs trajects preveda la SBB pervi da la gronda dumonda dad utilisar «trens confortabels cun dapli sezs». Uschia datti dapli trajects cun vaguns a dus plauns – sco per exempel tranter Turitg e Lucerna. En pliras regiuns da la Svizra tudestga datti dapli trens regiunals rapids – sco per exempel il tact da mes'ura da la S211 tranter Dietikon (ZH) ed Aarau.
Las midadas da l'urari van en vigur cun ils 10 da december da quest onn.