Tessin, Turitg e Grischun – economia, art e cultura. Sin quests champs sa mova Urezza Famos geograficamain e professiunalmain. La dunna oriunda da Valsot ha studegià economia da manaschi a Turitg ed ha silsuenter aschuntà il master da management d'art e cultura a Basilea.
Sco interprendidra interesseschan las dumondas da cultura ed art mai. Tgei che schabegia sin champ cultural ha in'influenza sin noss bainesser economic. Senza cultura dat mintga societad ensemen – era en vista economica.
Editura dal «Piz» e dal «Zürichseemagazin»
Ultra da sia lavur sco cussegliadra per interpresas è Urezza Famos era l'inizianta ed editura da dus magazins. L'onn 1994 ha Urezza Famos inizià ed edì il magazin Piz. In magazin che tracta tematicas da las valladas dal sid dal Grischun e da l'Engiadina.
Il medem model ha la dunna da 57 onns era lantschà per la regiun enturn la riva dal lai da Turitg. Quai or dal motiv ch'Urezza Famos ha dasper l'Engiadina ses segund domicil ad Uetikon. Uschia ha ella l'october 2017 edì l'emprima giada il magazin «Goldküstenmagazin» che porta dapi il december 2018 il num «Zürichseemagazin».
Omadus magazins han l'intenziun da raquintar istorgias regiunalas che na vegnan uschiglio plitost a la curta en las medias. Sper las contribuziuns e reportaschas a scrit vegn mess gronda paisa sin la fotografia. Uschia vegn mintga magazin accumpagnà d'in fotograf professiunal.
Las fotografias en ils magazins sa movan tranter il motiv realistic ed il motiv artistic-creativ.
RR actualitad 08:00