Ils ferms urizis da sonda saira han chaschunà donns enorms e procurà per sbuvaditschs, inundaziuns e che l’electricitad è crudada ora. Sco la citad da Zofingen ha communitgà, quinta ella cun in donn da passa 100 milliuns francs.
Varga 320 annunzias da donns
Tranter auter ha quai innundà vias, tschalers ed era manaschis en la zona d’industria. En la chasa da parcar tar la staziun dal tren han las massas d’aua stuschà ensemen ils autos ed uschia chaschunà donns totals tar bun 100 vehichels. En tut ha la centrala d'urgenza nudà passa 320 annunzias da donns.
300 forzas d'agid
En tut eran en acziun a Zofingen la sonda notg radund 300 pumpiers e commembers da la protecziun civila. Er la dumengia han da quai da 120 forzas d’agid fatg urden e rumì si en la citad.
Vias e trajects da tren serrads
La malaura ha era impedì il traffic. Uschia è stada serrada per in temp l'autostrada A1 en la regiun da Zofingen. E medemamain interrut è stà il traffic da tren tranter Olten e Lucerna.
Chametgs in pau dapertut
La sonda suentermezdi e la saira hai dà per part ferms urizis en bleras parts da la Svizra. Ils pli ferms urizis ha MeteoSvizra registrà en la part dal sid dal Giura ed al Lai da Constanza. E plirs lieus èn era stads pertutgads da granella.
RR novitads 06:00++