Siglir tar il cuntegn

Svizra Urs Schwaller: «Jau sun consternà»

Durant las ultimas 24 uras ha s'extendì l'affera dals autos da posta ad in scandal da posta: La dumengia saira ha annunzià la scheffa da la posta Susanne Ruoff sia demissiun. Uss ha il cussegl administrativ da la posta annunzià da vulair relaschar ils commembers da la direcziun da l'AutoDaPosta SA.

Urs Schwaller discurra.
Legenda: Nagins mecanissems da controlla tar la Posta – Urs Schwaller annunzia en la conferenza per las medias las consequenzas da la Posta tar l'affera enturn ils autos. RTR, Adrian Camartin

Actualmain infurmescha il president da la Posta Urs Schwaller da l’affera tar l’AutoDaPosta SA. Suenter la retratga da Susanne Ruoff aveva intunà la president da la cumissiun per traffic e communicaziun dal Cussegl naziunal Edith Graf-Litscher (PS/TG), che l’affera na saja anc betg serrada giu. Impurtant sajan ils rapports da la Posta e dal Uffizi federal da polizia, ha ditg Graf.

Il Cussegl federal argumentescha sia decisiun da na betg dar la distgargia cumplaina al cussegl administrativ da la Posta cun «las irregularitads constatadas en connex cun subvenziuns retratgas entras l’AutoDaPosta SA».

Cugliunarias betg perstgisablas

La cussegliera federala Doris Leuthard ha numnà las cugliunarias da l'AutodaPosta SA sco betg perstgisablas. Quai fetschia donn al service public en general. I saja uss da trair las consequenzas e da chattar ora pertge che las cugliunarias sajan vegnidas a la glisch pir uschè tard. Emprimas indicaziuns haja gia dà il 2012. Quai ha ditg Leuthard il glindesdi a Berna avant las medias.

Tar las relaschadas da la direcziun da l'Auto da Posta SA ha la cussegliera federala ditg, ch'i fetschia senn da trair consequenzas persunalas per puspè pudair bajegiar si la fidanza en l'interpresa.

Affera AutoDaPosta

L’entschatta favrer era vegni enconuschent che l’AutoDaPosta SA haja onns a la lunga survegnì subvenziuns per lingias che faschevan gudogn. Uss pretendan ils chantuns 78,3 milliuns francs enavos.

L’affera d’autos da posta

Actualmain examinescha la Fedpol co che l’Auto da Posta Svizra SA ha sa laschà subvenziunar tar il traffic regiunal. Tar ina revisiun regulara aveva l'Uffizi federal da traffic constatà irregularitads: L’AutoDaPosta SA haja transferì durant plirs onns gudogns da la sparta subvenziunada dal traffic public en ina sparta betg subvenziunada. Da far gudogns en la sparta subvenziunada è però scumandà. Perquai haja l'AutoDaPosta Svizra SA da pajar enavos almain 78 milliuns francs.

RR actualitads 12:00