Siglir tar il cuntegn

Header

Navigaziun

Andrea Broggini ed Ursula Nold.
Legenda: Andrea Broggini ed Ursula Nold. Keystone
cuntegn

Svizra Ursula Nold è la nova presidenta dal Migros

Che Ursula Nold daventa nova presidenta da l'adiminstraziun dal Migros è ina surpraisa. Ina maioritad dals delegads e da las delegadas ha uschia guntgì la candidata uffiziala Jeannine Pilloud. Nold succeda ad Andrea Broggini ch'è sa retratg.

Atgnamain aveva il Migros nominà sco candidata uffiziala Jeannine Pilloud, l'anteriura scheffa dal traffic da persunas tar la SBB. Las 111 delegadas e delegads da las regiuns ch'èn sa radunads la sonda a Turitg, han dentant dà la preferenza a la candidata da cumbat, Ursula Nold. Davent dal prim da fanadur vegn l'administraziun dal Migros uschia per l'emprima giada presidiada d'ina dunna.

L'administraziun dal Migros

Personen-Box aufklappenPersonen-Box zuklappen

L'administraziun da Migros ha 23 commembers e commembras. Da quels èn 10 externs ed independents e 13 commembers interns, tranter quels ils 10 represchentants da las cooperaziuns regiunalas.

Tar las cumpetenzas da l'administraziun tutgan fixar la strategia, la concepziun da la contabilitad sco er la planisaziun e la controlla da las finanzas. L'administraziun ha la responsabladad per las structuras e l'organisaziun e nominescha e survegliescha la direcziun generala.

Auter che Jeannine Pilloud è Ursula Nold gia enconuschenta tar il Migros. Ella è stada ils ultims onns presidenta da la radunanza da delegads dal grossist. Ultra da quai è Nold dapi il 2005 docenta e responsabla per il sectur da svilup da cader e sistem a la Scol'auta da pedagogia da Berna. Dasperas è ella commembra dal cussegl d'administraziun dal purschider da scolaziuns «WKS KV Bildung», presidenta dal cussegl d'administraziun da Be Advanced, in'interpresa che sustegna interpresas pitschnas e mesaunas, sco er cussegliera da fundaziun da «Konzert Theater Bern».

RR novitads 12:00