Uschia vul il Cussegl federal cuntanscher las finamiras dal clima

La Svizra duai smesar las emissiuns da gas da serra fin il 2030 en cumparegliaziun il 1990. Il Cussegl federal ha avert la consultaziun da la politica dal clima suenter il 2020.

cuntrada en muntogna, in aual cun ina pitschan punt Bild in Lightbox öffnen.

Legenda da maletgs: La Svizra sco pajais da las Alps è pertutgada ferm da la midada dal clima. Da quai è il Cussegl federal persvadì. Keystone

Trais fatschentas per la consultaziun:

  • ratifitgar la cunvegna dal clima da Paris
  • la revisiun totala da la lescha da CO2, nua che finamiras e mesiras vegnan francadas,
  • la cunvegna cun l'UE per colliar il commerzi d'emissiuns

La consultaziun davart las trais fatschentas dura enfin ils 30 da november 2016.

Parlament sto ratifitgar las finamiras dal clima da Paris

Ils terms eran gia enconuschent. Il december passà ha la cuminanza dals stadis deliberà la cunvegna dal clima cun la finamira da tegnair ils stgaudament global cleramain sut 2 grads. La cunvegna oblighescha tut ils stadis da decider mesiras per reducir ils gas da serra. Ella va en vigur uschespert che almain 55 stadis ch'èn responsabels per 55% da las emissiuns da gas da serra ratifitgeschan la cunvegna. En la Svizra sto il parlament federal far quai.

Rinforzar las mesiras fin ussa

Per realisar la cunvegna duai vegnir revedì la lescha da CO2. Il Cussegl federal vul cuntanscher entaifer il pajais ina reducziun d'almain 30%, quai entras mesiras. Ils ulteriurs 20% pudessen vegnir dal commerzi d'emissiuns u entras ina reducziun d'emissiuns en l'exteriur. Ils instruments ord la lescha da CO2 actuala duain restar e vegnir rinforzads.

Era l'agricultura è pertutgada

Il Cussegl federal vul fixar finamiras intermediaras. Da nov pertutgan las finamiras betg mo il sectur da bajetgs, traffic ed industria, mabain era l'agricultura. Lezza duai er prestar sia cumpart a la reducziun entras la politica agrara.