Dasper ils restaurants duain er instituziuns da cultura, da trategniment, dal temp liber e dal sport puspè pudair avrir. Quai ha la cumissiun decidì cun 12 encunter 1 vuschs ed ina abstenziun. La cumissiun d'economia ha uschia approvà ina proposta da la cumissiun da sanadad dal cussegl naziunal.
Per la maioritad da la cumissiun lubescha la situaziun epidemiologica quest pass. I na saja betg pli giustifitgà da franar la vita sociala ed economica. La minoritad da la cumissiun ha refusà da vulair fixar questa data en la lescha. Quai restrenschia las pussaivladads dal Cussegl federal da pudair reagir sin novs svilups da la pandemia.
Buccarè per la taskforce
La taskforce scientifica dal Cussegl federal na duai betg pli pudair s'exprimer davart mesiras encunter il coronavirus. Las infurmaziuns a la publicitad duai be pli dar entras il Cussegl federal ed il parlament. Quest punct pretenda la cumissiun cun 13 encunter 10 vuschs e duas abstenziuns.
Ultra da quai vul la cumissiun er restrenscher las cumpetenzas dal Cussegl federal. Quel duai be pli ordinar serradas d'instituziuns dal public u in obligatori da homeoffice per maximal 90 dis. Plinavant duain chantuns cun in svilup positiv da la situaziun epidemiologica pudair profitar da schluccadas.
