Siglir tar il cuntegn
Inhalt

Svizra Uss èn las dronas tar il Cussegl federal

L'idea da Martin Candinas (PCD/GR) ha persvadì tuttas duas chombras dal parlament: Dronas ston vegnir registradas en avegnir. Uss ha dad elavurar il Cussegl federal ina lescha en chaussa. Quai rapportescha l'agentura da novitads svizra SDA da la sessiun a Berna.

Chasa federala or da l'aria.
Legenda: Dronas èn tema en la Chasa federala – ina lescha nova duai stgaffir la basa per lur diever e controlla. Keystone

Suenter ch'il Cussegl naziunal ha gia decis è seguì la mesemna er il Cussegl dals chantuns senza opposiziun a la moziun dal cusseglier naziunal Martin Candinas (PCD/GR).

Boom da dronas pretenda regulaziuns da segirezza

Cun incumbensar il Cussegl federal dad elavurar ina lescha per registrar dronas vul il parlament stgaffir ina basa per in traffic da dronas segir. Oravant tut veglia il parlament cuntanscher che las dronas han da vegnir registradas e che lur diever possia vegnir surveglià e controllà.

Skyguide cumenza gia da survegliar dronas

En sia resposta a la moziun Candinas aveva il Cussegl federal gia scrit, ch'il center da segirezza da sgol Skyguide surpiglia gia quest onn da survegliar intginas dronas cun in servetsch automatisà.

Tar quel servetsch tutgia da registrar dronas e survegliar ellas durant lur sgol. Uschia duaja vegnir reducì il privel ch'ellas collideschan cun eroplans, scriva la SDA.

Dronas mettan er en moviment l'UE

Er l'Uniun europeica UE lavurai vi dad in reglament per l'uschenumnada aviatica nunequipada. Raschun per far quai è il svilup da tut l'industria ch'è colliada cun las dronas.

Tenor il Cussegl federal haja la Svizra «grond interess economic» da surpigliar questas reglas. Be uschia saja pussaivel che l'industria da dronas svizra haja access al martgà europeic.

La moziun «Segirezza ed urden tar il manaschi da dronas»

Personen-Box aufklappenPersonen-Box zuklappen

Cun questa moziun pretenda il cusseglier naziunal Martin Candinas (PCD/GR), ch’il Cussegl federal reglamentescha il diever da dronas per segirar il traffic en l’aria. La lescha nova duai stgaffir la basa per il diever e la controlla da dronas. Cun quai ch’i sajan adina dapli dronas en l’aria creschia er il privel da collisiuns ed auters donns. Quels vul Martin Candinas reglamentar da maniera «raschunaivla» – quai cunzunt er pervi dals avantatgs da las dronas. Ellas possian esser nizzaivlas en l’agricultura, sin il sectur da sanadad e tar acziuns d’agid. En pli renda Candinas attent a l’impurtanza economica da las dronas – tant per quels che sviluppeschan ellas sco er per quels che fan commerzialmain diever dad ellas.

RR novitads 11:00