Siglir tar il cuntegn
Inhalt

Svizra Uvestg Huonder: Turitg forsa, Svizra originara na

L’uvestg da Cuira ha publitgà il resultat da l'enquista davart ina pussibla reorganisaziun da l’uvestgieu da Cuira. La conclusiun da Vitus Huonder: Il project per in uvestgieu Turitg resta in’opziun - in uvestgieu Svizra originara cun Sviz, Uri, Sut- e Sursilvania perencunter è giud maisa.

Portrait da Vitus Huonder
Legenda: L'uvestg ha preschentà sias conclusiuns tar l'enquista - quella è vegnida fatga tar 900 collavuraturs da la baselgia. Keystone

Quest’avantmezdi ha l’uvestgieu da Cuira publitgà sin sia pagina en la rait il rapport detaglià da l’enquista e las conclusiuns da l’uvestg Huonder tar quella.

Las conclusiuns da l'uvestg

En ina charta a tut ils collavuraturs da l’uvestgieu da Cuira declera l’uvestg detagliadamain sias conclusiuns tar ils resultads da l’enquista:

  • Far in uvestgieu Svizra originara - vegn mess tenor ils resultads da l’enquista e las posiziuns da las regenzas ad acta. L’uvestg haja preschentà quell’idea per vegnir encunter als crettaivels en la Svizra interna.
  • Far in uvestgieu Turitg – cun quai che l’idea haja chattà accoglientscha da pliras varts, metta Huonder en discussiun la dumonda, schebain sch’el duess installar «ina pitschna cumissiun» en chaussa. Tenor la charta da l’uvestg sajan vegnids quantitativamain dapli arguments a favur dad in uvestgieu da Turitg. El valitescha dentant ils arguments tenor lur relevanza «per la prosperitad a lunga vista da l’uvestgieu e ses crettaivels».
  • Reorganisar tut ils uvestgieus en Svizra - na maina pervi da la cumplexitad da tractativas tenor l’uvestg betg ad ina soluziun.

Per vegnir a quels resultats ha l'uvestg da Cuira contactà 900 collavuraturs da la baselgia. Sco quai che l'uvestg scriva en sia brev davart ils resultats saja l'enquista fruntada sin ina gronda resonanza. Radund 50% dals dumandads hajan prendì posiziun en chaussa.

Portrait Uvestg Huonder
Legenda: Keystone
L’uvestgieu da Cuira tutga tar la DNA dal Grischun.
Autur: Vitus HuonderUvestg da Cuira

L’uvestg sa mussa cuntent dal fat, che la regenza dal chantun Grischun è decisamain per Cuira sco sedia episcopala. Huonder sustegna quell’idea. Gia or da raschuns organisatoricas e geograficas possia Turitg mo avair ina valur simbolica e na pratica, dimena «pastorala».

L’uvestgieu da Cuira tutgia, malgrà differentas discordias en l’istorgia cun il Grischun, «tar la DNA da quest chantun».

L'enquista dettia in’impressiun represchentativa, communitgescha l’uvestgieu. Ch'i dettia nagin moviment per «sa-schliar-da-Cuira» valiteschia el sco mussament da confidenza, scriva Vitus Huonder.

RR novitads 09:00+