Il TCS – il Touring Club Svizra – quinta per las proximas emnas cun in traffic da vacanzas da record via Mar Mediterrana. Questa stad vegnian vacanzas cun l'auto ad esser uschè popularas sco anc mai ha ditg il directur general dal TCS, Jürg Wittwer, envers la «SonntagsZeitung».
Suenter dus onns pandemia eviteschia la glieud aunc adina meds publics. Tranter auter è pervia dal caos tar numerus eroports ed ils sgols che vegnan stritgads sa decidian blers per l'auto. La consequenza saja lungas colonnas envers sid. Tenor il TCS pertutga quai surtut l'Italia, la Frantscha, la Spagna ed il Portugal. Problems sajan dentant era da spetgar envers Croazia. E quai oravant tut tranter mez fanadur e mez avust.
En plirs stadis tudestgs han las vacanzas schon entschet questa fin d’emna, a partir da l'autra emna entschaivan lura quellas en l'entira Frantscha. Il TCS avertescha surtut da problems pervia da pannas pussaivlas. Il mument hajan las garaschas ed ils servetschs da panna a l’exteriur memia pauc persunal per dar dumogn a la fulla. Lura saja era da quintar cun problems pervia da mancanza da tocs da reserva.
Or da l'archiv
Il Grischun ha gia gì traffic da record sur Tschuncaisma
