En il mument èn 13,5 milliun dosas da vaccin prontas per vaccinar cunter corona. La Confederaziun è plinavant s'obligada da cumprar ulteriuras 13,6 milliuns dosas. Quai scriva la «Neue Zürcher Zeitung» il venderdi.
L'uffizi federal da sanadad discurra d'ina strategia da segirtad. I vegn empustà da differents producents da vaccins, ed er differents tips da vaccin, per exempel da quels sin basa da la tecnologia dad mRNA u da proteins.
La prontadad da sa laschar vaccinar en Svizra n'è betg gronda tenor la NZZ. Mo 37% da las persunas specialmain periclitadas (65+) tras il virus han laschà dar in vaccin u in booster ils 6 mais passads. En tut ha la Svizra duvrà 17 milliuns dosas da vaccin.
Fin uss han la Confederaziun ed ils chantuns stuì dismetter bunamain 3,5 milliuns dosas da vaccin cunter corona. Ed er en la Belgia aveva la Svizra reservas da bunamain 8 milliuns dosas che fissan en in segund pass stadas a disposiziun per pajais pli povers. Damai che l'interess ha mancà èn era questas dosas finidas en il rument.
