Siglir tar il cuntegn

Header

cuntegn

Vaccinar cunter coronavirus Persunal da tgira cunter scursanir paja en cas da quarantina

Legenda: Il persunal da tgira saja quai da motivar auter da sa laschar vaccinar – squitsch saja contraproductiv, di l'uniun da tgirunzas e tgirunzs. Keystone

L'Uniun da las tgirunzas e dals tgirunzs refusa da reducir la paja al persunal betg vaccinà, sch'i ston ir en quarantina. La mesira na saja betg adattada e cuntraproductiva. Uschia na vegnia il persunal da tgira betg motivà da sa laschar vaccinar. Tant pli, sch'els stoppian ir en quarantina, perquai ch'i sajan s'infectads al lieu da lavur, ha respundì l'uniun a l'agentura da novitads Keystone-SDA. Squitsch na saja nagina schliaziun.

Legal, però cuntraproductiv

Al persunal betg vaccinà en ils ospitals en il chantun Giura smanatscha a partir dal settember ina reducziun da 20% da la paja en cas da quarantina, sch'i n'èn betg vaccinads. Tenor dretg da lavur saja quai bain ina mesira legala, sch'ins interpreteschia la quarantina sco malsogna. I dettia però autras vias per motivar insatgi da sa laschar vaccinar – sco per exempel cussegliar e reducir las temas.

Tests obligatoris per na-vaccinads beneventads

D'introducir tests obligatoris per il persunal betg vaccinà beneventa l'uniun da las tgirunzas e dals tgirunzs. La Confederaziun aveva proponì d'introducir l'obligaziun da far tests per persuna che lavuran en il sectur da sanadad e che n'èn betg vaccinadas. La conferenza da directuras e directurs da sanadad chantunals aveva silsuenter prendì posiziun precautamain. Ins na duai betg far squitsch sin singulas persunas, mabain sa focussar sin la campagna da vaccinaziun generala, uschia la conferenza.

audio
Per tadlar curt e cumpact
01:00 min, RTR Audio dals 30.07.2021.
laschar ir. Durada: 01:00 minutas.

RTR novitads 15:00

Artitgels legids il pli savens

Scrollar a sanestra Scrollar a dretga