Siglir tar il cuntegn

Header

cuntegn

Vaccinaziun cunter la grippa A partir da mez october pon ins sa laschar vaccinar

Betg be il segund booster cunter corona è a disposiziun, ma er la vaccinaziun annuala da la grippa. Tenor l'Uffizi federal da sanadad publica (BAG) è quella disponibla a partir da mez october. L'Uffizi federal da sanadad cusseglia la vaccinaziun surtut a las suandantas persunas:

  • persunas pli veglias che 65 onns
  • dunnas en speranza u ch'han parturì en las ultimas quatter emnas
  • pops naschids prematurmain tranter sis mais e dus onns
  • persunas cun differentas malsognas cronicas sco malatias dal cor, dals pulmuns, dals gnirunchels u er cun malsognas d'autoimmunitad
  • persunas en chasas da tgira u en instituziuns cun persunas cun malsognas cronicas.
  • persunal medicinal, da tgira, en canortas u en chasas da vegls

Per questas persunas surpiglia l'assicuranza da basa ils custs.

La recumandaziun da vaccinar vala er per persunas ch'han regularmain contact cun las persunas enumeradas sura u cun poppins sut sis mais. Els na pon betg vegnir vaccinads.

Cumbinabla cun il booster cunter Covid

Ina vaccinaziun cunter la grippa po vegnir fatga suenter u a medem temp sco ina vaccinaziun da Covid. Il meglier temp da sa laschar vaccinar cunter la grippa è tenor il BAG tranter mez october fin l'entschatta da l'unda da grippa.

Ils ultims dus onns hajan las mesiras da Covid effectuà ch'il virus da la grippa n'è betg sa derasà uschè fitg. Tenor il BAG na munta quai però betg ch'i na saja betg pli da prender serius la grippa.

Ils 25 da november 2022 datti per las 19avla giada in di naziunal da la vaccinaziun cunter la grippa. Quel di vegni ad esser pussibel da sa laschar vaccinar in bleras praticas da medis ed apotecas per ina pauschala da 30 francs.

Ulteriuras infurmaziuns davart la vaccinaziun porschan tut ils medis da chasa u la Confederaziun sin: schutzvordrgrippe.ch

audio
Per tadlar: las novitads da las 18:00
ord RTR Audio dals 13.10.2022.
laschar ir. Durada: 5 minutas 29 Secundas.

RTR novitads 15:00

Artitgels legids il pli savens