Siglir tar il cuntegn

Header

audio
Vaccinar cunter corona e cunter la grippa?
Or da Co e cum dals 19.10.2021.
abspielen. Laufzeit 3 minutas 44 Sekunden.
cuntegn

Vaccinaziun cunter la grippa I pudess dar in'unda da grippa «normala»

L'enviern passà n'hai dà nagina unda da grippa en Svizra. Las mesiras da corona han pudì tegnair a mastrin la derasaziun da la grippa. Actualmain parta il BAG però dal fatg che las mesiras da corona vegnan schluccadas proximamain en l'Europa e ch'i pudess uschia dar ina «normala» unda da grippa.

Ch'i dettia ina pli ferma unda da grippa ch'ils onns avant na quinta l'Uffizi federal da sanadad betg. Er suenter l'enviern passà cun ina «pausa da grippa» saja la populaziun anc per part immuna, sco il BAG scriva sin dumonda da RTR. La grippa saja da prender serius, cunquai che cumplicaziuns possian manar a la mort.

Corona e grippa: Tge èsi da resguardar en spezial? A tgi ch'ha sintoms da grippa cusseglia il BAG en emprima lingia da far in test da corona, cunquai ch'ils sintoms sumeglian. Quai valia per tuttas e tuts, vul dir tant per persunas vaccinadas cunter corona u/e la grippa, sco er per persunas betg vaccinadas.

Vaccinar cunter corona e grippa? Persunas interessadas pon laschar dar il medem mument omadus vaccins, i na dettia nagina cunterindicaziun, scriva il BAG.

Per tgi vala il cussegl da vaccinar en spezial? En general cusseglia il BAG a persunas cun in pli grond ristg da cumplicaziuns da laschar vaccinar cunter la grippa. Quai èn per l'ina persunas sur 65, per l'autra persunas ch'han ina malsogna cronica – per exempel ina malsogna da la via respiratorica u dal cor – e la finala a dunnas en speranza.

Cura e nua vaccinar cunter la grippa? A partir da mez october enfin mez schaner, cura che la grippa cumenza a circular en Svizra. Persunas interessadas pon laschar dar la vaccinaziun cunter la grippa tar il medi u er en apotecas. Ils 5 da november 2021 è il di da la vaccinaziun cunter la grippa, cura che bleras praticas da medis e medias porschan vaccinaziuns spontanas.

RTR Co e cum 11:15

Artitgels legids il pli savens

Scrollar a sanestra Scrollar a dretga