En Svizra èn fin uss passa 8,5 milliuns dosas da vaccins cunter Covid-19 vegnidas injectadas. En radund 4’300 cas sajan effects secundars nungiavischads vegnids annunziads. Dus terzs da quels effects secundars na sajan betg stads gravants. Quai ha communitgà Swissmedic, l’Institut svizzer per products terapeutics.
En 128 dals cas gravants, sajan las persunas pertutgadas mortas. Swissmedic ha dentant suttastritgà ch’i na dettia nagins indizis concrets che quests mortoris stettian en connex cun la vaccinaziun. En media sajan questas persunas stadas sur 80 onns.
Plinavant saja er sa mussà ch'il vaccin da Moderna chaschunia pli savens (en bun 60% dals cas) effects secundars negativs che quel da Pfizer/Biontech (en 37% dals cas). Questa analisa dals effects secundars negativs na midia tenor Swissmedic però nagut vi dal profil da ristg e niz dals dus vaccins lubids en Svizra.
