Era sch'el ha cumenzà sia carriera en il Cussegl federal sco minister da defensiun e da sport vegn Ueli Maurer a restar en memoria plitost sco minister da finanzas. Sut el è la refurma dispitaivla da l’imposiziun da taglia sin interpresas grategiada. El vegn ludà da tut las varts per ils pachets d’agid durant la crisa da corona ed ils budgets preschentads han adina pudì laschar vaira.
La gronda sconfitta en sia carriera en il Cussegl federal vegn a restar la votaziun davart ils aviuns da cumbat Gripen. Quella cumpra è vegnida sbittada a l’urna ed è stada per Maurer, ch’era da quel temp minister da defensiun, ina trumpada.
Ueli Maurer è in cusseglier federal che lascha enavos fastizs en la politica svizra. Gia avant ses temp en il Cussegl federal ha el sco president da la Partida populara svizra pudì etablir quella sco partida cun las pli bleras electuras ed electurs. Dasper Christoph Blocher è Ueli Maurer ina da las persunas che han furmà il PPS.
Fabia Caduff
Correspundenta Chasa federala
