Ultra da quai valan per tals manaschis mesiras spezialas en connex cun il «contact tracing». Quels che serran pir suenter mesanotg, ston dumandar lur clientella las datas da contact e verifitgar quellas cun in document d'identitad. Quai ha communitgà il departament chantunal da sanadad.
La derasaziun dal virus en il Vallais è actualmain sut controlla. Il dumber da novs cas positivs saja restà pitschen, e las mesiras d’isolar e trametter en quarantina persunas sajan sa cumprovadas – hai num dal departament da sanadad.
Gia auters chantuns rigurus
Plirs chantuns han gia limità il dumber da giasts en clubs e bars pervi da la pandemia. Zug lubescha davent da glindesdi mo pli 30 persunas en l’intern dals locals. E limitas da 100 giasts fin la fin da l’onn, han decidì ils chantuns Basilea-Citad, Basilea-Champagna, Soloturn, Argovia e Tessin.
