Da schaner fin la fin d'october da quest onn è la populaziun da lufs en il chantun Vallais sa dublegiada da 9 sin 18 animals. Il post da chatscha, pestga e selvaschina dal Vallais ha tratg bilantscha davart las consequenzas dal luf en il chantun: Malgrà il pli aut dumber da lufs, èn vegnids stgarpads damain animals da niz che anc l'onn avant.
En tut han ils lufs en il Vallais stgarpà quest onn 205 animals da niz. L'onn passà eran quai anc stads 269 animals. Pertge ch'i sajan vegnids stgarpads damain animals, saja grev da dir. Probablamain hajan ils possessurs d'animals meglierà la protecziun da las muntaneras, ha declerà il biolog da selvaschina, Sascha Wellig, envers l'agentura da novitads Keystone-SDA.
Il donn economic ch'ils lufs han fatg cun stgarpar animals da niz munta en il Vallais a 66'615 francs. 80% da quests custs surpiglia la Confederaziun.
Ord l'archiv:
Er en Grischun crescha la populaziun dal luf. Il favrer è l'emissiun Cuntrasts sa fatschentada cun il luf.
RTR novitads 15:00