L'uniun per la protecziun da la natira Pro Natura Vallais ha inoltrà ina protesta cunter il project fotovoltaic tar Gondo VS. Il rapport ecologic per il project planisà Gondosolar haja deblezzas considerablas. Quai impedeschia in'examinaziun dals disturbis ed impedeschia da ponderar bain avunda ils interess.
En spezial manchian las examinaziuns davart amfibis, reptils, utschels-mezmieur e tgirallas, crititgescha l'associaziun en ina communicaziun. Era pertutgant tschertas spezias d’utschels sco la giaglina da draussa saja la situaziun da las datas anc fitg satiglia. Quellas examinaziuns stoppian vegnir fatgas avant ch’i dettia ina lubientscha, pretenda la Pro Natura Valais.
Plinavant crititgescha l’associaziun ch’i manchia en il chantun Vallais ina planisaziun generala surordinada cun la quala ins tscherniss ils lieus ils pli adattads per implants da fotovoltaica gronds. Era n’haja enfin ussa dà nagina maisa radunda, malgrà ch’ina tala saja vegnida annunziada per l’emprim quartal 2024.
Questa mancanza sa mussia exemplaricamain tar il project qua avant maun. «I duai vegnir construì in implant en in lieu popular amez la natira intacta, senza ch’i vegnia examinà, sch’i dettia auters lieus che fissan colliads cun ina intervenziun pli pitschna en la natira ed en la cuntrada e che pudessan vegnir realisads pli favuraivel», scriva l’associaziun.
Spetgà ina permissiun da construcziun mez 2024
Ils promoturs dal project avevan inoltrà la dumonda da permissiun da construcziun cun l’examinaziun ecologica il december passà a la cumissiun chantunala da construcziun. Igl è stà l’emprim dals numerus projects da parcs solars alpins en il Vallais che aveva fatg quest pass. Ils purtaders dal project han lura dà enconuschent ch’els sperian da survegnir la lubientscha da bajegiar enfin mez da l’onn 2024. La protesta pudess ussa chaschunar in retard. L’implant cun radund 2'200 indrizs solars duai vegnir construì sur Gondo sin passa 2'000 meters autezza sin ina surfatscha da 17,4 hectaras. Tenor ils purtaders dal project vegn ella a producir en la media ca. 22 uras gigawatt (GWh) electricitad per onn.