Il mars da quest onn ha la surveglianza da chatscha sajettà dus lufs en la Val d’Hérens. Uss ha l’Uffizi da chatscha, pestga ed animals selvadis dal chantun Vallais communitgà, che l’analisa da gens haja mussà ch’il mastgel n’appartegnaivia betg al triep da la Val d’Hérens. Pia saja la schluppettada betg stada giustifitgada era sch'ils guardiaselvaschina professiunals hajan resguardà tut las mesiras da precauziun. Quest sbagl demussia quant grev ch’i saja da regular l’animal da rapina tenor las leschas. L'auter luf sajettà saja dentant ina cogna descendenta dal triep. La lubientscha era da sajettar dus lufs giuvens dal triep en la Val d’Hérens.
Sajettà in ulteriur luf il fanadur
Il fanadur è vegnì sajettà en la regiun Chésery-Fontaine in ulteriur luf, pia aifer il territori definì e tenor la lubientscha. L'animal vegnia uss tramess a l'Universitad da Berna per l'identificaziun. Ils 14 da fanadur aveva la regenza vallesana ordinà da sajettar il luf, damai ch'el aveva stgarpà 12 animals da niz en la regiun Val d’Illiez. Questa lubientscha ha valì a partir da venderdi per 60 dis.
Ulteriur luf dastga vegnir sajettà
En il chantun Vallais dastga anc in luf vegnir sajettà, quai en la regiun Goms-Aletsch. Er qua han las autoritads peda 60 dis per far quai. Quest luf aveva stgarpà 30 animals da niz sin ina alp nua che mesiras da protecziun n’èn betg pussaivlas.
Cundiziuns per sajettar in luf
L’ordinaziun revedida da la lescha federala davart la chatscha permetta da sajettar in luf singul sche quel ha stgarpà almain 10 nursas u chauras entaifer 4 mais. Ils animals ston però esser sin alps protegidas u alps ch’ins na po betg proteger. En in triep astgan lu vegnids sajettads la mesadad dals lufs giuvens.
Il chantun Vallais ha cunquai gia sajettà tschintg lufs dapi l'entschatta dal 2022.
Ord l'archiv
