- En il Vallais han las forzas da salvament entant chattà las baras da tschintg dals sis skiunzs da turas ch'eran sparids.
- La gruppa è partida la sonda a Zermatt ed è dapi lura sparida en il territori enturn la Tête Blanche ch'è 3'706 meters auta.
- Tar ils skiunzs sa tracti da 5 commembers d'ina famiglia vallesana ed ina persuna dal chantun Friburg, tuttas en la vegliadetgna tranter 21 e 58 onns.
En il Vallais han las forzas da salvament entant chattà las baras da tschintg dals sis skiunzs da turas ch'eran sparids en la regiun dal piz Tête Blanche. La sisavla persuna sparida n'hajan ins anc betg pudì localisar, la tschertga cuntinuschia però, sco la Polizia chantunala vallesana communitgescha. La tschertga è vegnida impedida la dumengia ditg pervi da l'aura. Pir la saira suenter las nov han las forzas da salvament cuntanschì la regiun.
Sco quai che la Polizia chantunala dal Vallais ha communitgà la dumengia, sa chattava la gruppa sin la ruta da skis tranter Zermatt ed Arolla. La Tête Blanche è a mesa via tranter ils dus lieus. Sunter ch'ils skiunzs n'eran betg turnads al lieu fatg giu aveva in commember da la famiglia dà alarm. Dapi l'annunzia da spariziun èn tenor la polizia tuttas equipas da salvament alarmadas sin omaduas varts da la ruta.
