Siglir tar il cuntegn
cuntegn

Svizra Valora na venda betg pli cigarettas a minorens

Davent dal prim da schaner ston ins avair 18 onns per survegnir tar Valora cigarettas ed auters products da tubac, sco era cigarettas electronicas. Els auzian voluntarmain la vegliadetgna minimala, scriva la chadaina da kiosks

Purtret d'in regal cun cigarettas ed in maun che piglia or in pachet.
Legenda: La chadaina da Kiosks, Valora na venda nagins products da tubac pli a giuvenils sut 18 onns. Keystone

Valora auza cun quai la vegliadetgna er en quels chantuns nua ch'i fiss lubì da vender cigarettas er a giuvenils a partir da 16 onns. La vegliadetgna per vender products da tubac è reglà en Svizra tenor chantuns. Perquai variescha la vegliadetgna minimala. Ils ins han fixà la vegliadetgna da 16 onns, auters 18 onns ed anc ina giada auters n'han gnanc ina limita da vegliadetgna. Là ha Valora dentant er gia gì la regla da vender products da tubac be a persunas ch'èn gia 16.

D'auzar la limita sin 18 onns saja per Valora be logic, suenter ch'el hajan er mess la limita da 18 onns tar cigarettas electronicas, ha declerà Roger Vogt, il responsabel per il commerzi en detagl en Svizra. Valora veglia cun quai metter in ulteriur signal per la protecziun da giuvenils.

RR novitads 12:00