Valora porscha nov contract da lavur collectiv

Ils emploiads da la gruppa Valora survegnan a partir da l’auter onn in nov contract da lavur collectiv. La gruppa Valora maina tranter auter ina chadaina da kiosks. Il nov contract prevesa in auzament da la paja sco era in congedi da babs auzà.

Purtret dad in Kiosk che tutga tar Valora. Bild in Lightbox öffnen.

Legenda da maletgs: Valora augmenta las pajas, ma be tar persunal scolà. Keystone

Il nov contract da lavur collectiv prevesa in auzament da la paja minimala da mintgamai 50 francs ils proxims dus onns. Era vegn il congedi per babs auzà sin 10 dis, scriva la societad svizra d’emploiads da commerzi communabel cun la Valora.

Il contract da lavur collectiv duai era valair per collavuraturs da Kiosks independents che gestiuneschan il manaschi sin agen quint sin incumbensa da la Valora. Quai radund duas terzas da tut ils Kiosks da la gruppa.

A partir dal 2018 duai render pli fitg da sa scolar enavant. E la scolaziun duai survegnir dapli paisa, era finanzialamain. Il sindicat Syna recloma che la gronda part dals collavuraturs na profiteschia dentant betg dal nov contract. Uschia saja da beneventar ch'il contract porschia dapli dis da congedi per babs, ma la gronda part dals collavuraturs sajan dunnas. E damai che la paja vegnia auzada be per collavuraturs cun ina scolaziun na profiteschia il persunal che saja per la pli gronda part betg scolà er betg da l'augment.

RR novitads 12:00