- En il rom d'in program da spargn ha la Tamedia annunzià ina reducziun da plazzas tar sias medias da la Svizra tudestga.
- Fin 20 plazzas duain vegnir reducidas.
- Gia la mesemna era vegnida annunziada la reducziun da 28 plazzas en la Romandie.
Ch'il concern da Tamedia vul reducir en Svizra quasi 50 plazzas n'è betg plausibel per il sindicat Syndicom. Il concern ch'edescha tranter auter il «Tagesanzeiger» e «20 minuten» haja fatg l'onn passà in profit da 123 milliuns francs ed haja pajà 47 milliuns francs dividendas.
Las redacziuns sajan gia dapi la davosa runda da spargn suttapostas ad in enorm squitsch che vegnia uss anc augmentà. Syndicom stettia en contact cun las persunas pertutgadas e sustegnia ellas.
Revolta tar ils collavuraturs e las collavuraturas
Las redacziuns da «24 heures», «Tribune de Genève», «Le Matin dimanche», entginas rubricas da Tamedia, las collavuraturas ed ils collavuraturs da la fotografia, da la chasa editura e da layout, dal team digital ed anc plirs involvads han condemnà fermamain la reducziun da plazzas planisada.
3,5 milliuns francs vegnian spargnads sulettamain sin ils cust dal persunal. Il persunal da las redacziuns haja il nas plain d'ina direcziun che na investescha betg pli en lur medias e laschia murir ellas plaun a plaun sin cust d'abunents e da la societad, hai num en ina communicaziun da medias da la federaziun professiunala Impressum.
La pli gronda chasa editura da la Svizra desista uffizialmain da dar la pussaivladad a sias redacziuns da far lur lavur impurtanta per la democrazia en moda confurma al temp. El renunzia er a sia responsabladad sociala, laschond svanir plazzas da lavur en in sectur gia sbittà.
Quai saja d'attribuir per gronda part a decisiuns che sa basian dapi onns sulettamain sin ina logica da profit, ha crititgà il sindicat. Las ultimas mesiras da spargn èn suandadas ad in vast pachet da spargn dals onns passads. Ils ultims trais onns han las redacziuns dals titels da Tamedia gia stuì spargnar 70 milliuns francs.