Siglir tar il cuntegn

Header

cuntegn

Svizra Vegnir saun vegn pli char – ils malsauns duain pajar dapli

Suenter il cussegl naziunal è er la cumissiun da sanadad dal cussegl dals chantuns da l’avis che malsauns duain sa participar pli fitg als custs da tractament. Quai scriva l’agentura da novitads SDA.

La cumissiun da sanadad dal cussegl dals chantuns haja decis cun 7:4 vuschs dad acceptar in project da lescha en chaussa, scriva la SDA.

Franschisas per 50.- francs pli charas

Grazia a quella lescha vuless il Cussegl federal adattar las franschisas regularmain al svilup dals custs da la segiranza da malsauns obligatorica.

La lescha prevesa dad auzar la franschisa la pli bassa per 50 francs. Las franschisas per uffants na sajan dentant betg pertutgadas, scriva la SDA.

Atgna responsabladad vs. betg pajar anc dapli

Cun questa mesira veglia la maioritad da la cumissiun augmentar l'atgna responsabladad dals assicurads. La minoritad percunter dumonda al Cussegl dals chantuns da betg entrar en l’affar: La mesira tutgia en emprima lingia a persunas che sajan cronicamain malsaunas u a persunas che sajan avisadas da survegnir tractament. Enpli hajan ils segirads gia da sa participar avunda vi dals custs.

Sch'il Cussegl dals chantuns suonda a sia cumissiun ed uschia er al Cussegl naziunal, po il Cussegl federal elavurar in sboz da lescha.

RR novitads 17:00

Artitgels legids il pli savens