Il Cussegl federal vul extender la vendita da la dumengia da actualmain quatter dumengias sin maximalmain 12 per onn. Motivà vegn quai tras disas da cumpra ch'èn sa midadas e tras la concurrenza tras il commerzi online. Pervia da quai vul il Cussegl federal schluccar questas reglas e surlaschar la decisiun als chantuns co ch'els vulan ir enturn cun la vendita da la dumengia. Plinavant pudess la lavur da dumengia esser ina pussaivladad bainvegnida per studentas e students u geniturs per meglierar lur entradas.
L'Associaziun svizra dal commerzi en detagl Swiss Retail Federation accentuescha ch'avunda persunal saja interessà vi da la lavur da la dumengia e da la saira. Plinavant restia la decisiun davart averturas supplementaras la dumengia er en l'avegnir tar ils chantuns – e tar las fatschentas respectivas.
Il project da questa lescha vegn uriundamain d'ina iniziativa dal chantun Turitg – a questa èn lura seguidas tuttas duas cumissiuns parlamentaras. Ed era il Cussegl federal ha beneventà questa proposta.
Critica da la PS e sindicat
Critica datti dentant da la vart sanestra: l'uniun sindicala svizra descriva la proposta sco betg sociala perquai ch'ella pericliteschia la sanadad da emploiads ed emploiadas e na resguardia betg las decisiuns democraticas.
E la Partida socialdemocratica crititgescha l'idea perquai che la gronda part da las votaziuns dals ultims onns hajan mussà che la populaziun na veglia betg ina extensiun da las uras d'avertura da las butias. Per exempel ha la populaziun dal chantun Son Gagl ed era il chantun Vallais refusà ina tala refurma. La Partida socialdemocratica saja pronta da cumbatter la midada en la lescha da lavur.
Ultra da quai averteschan las criticras ed ils critichers che l'impurtanza da la dumengia sco di da paus cuminaivel per la famiglia, per las uniuns e per ils contacts socials pudess svanir.
Cumpra da dumengia existenta
En Svizra è la lavur da dumengia da princip scumandada, cun excepziuns per branschas sco ospitals, ustarias u traffic public. Sch'ins sto per exempel anc avair insatge per la tschaina la dumengia saira pon ins per exempel ir a staziuns da tren, eroports e tancadis – quests han ina lubientscha speziala.