Las interpresas svizras valiteschan la situaziun economica en general sco disfavuraivla. En cumparegliaziun cun l’entschatta da l’onn saja la situaziun per bleras interpresas sa pegiurada, quai resulta d'in studi da l’Institut da perscrutaziun da la conjunctura KOF da l’ETH a Turitg.
L’aboliziun dal curs minimal da l’euro saja il motiv principal per quest svilup negativ. Surtut en las regiuns da la Svizra orientala e dal nordvest da la Svizra saja la situaziun economica sa pegiurada. Malgrà quai taxescha la gronda part da las interpresas en Svizra la situaziun actuala sco anc positiva, scriva la KOF.
