En parts da la Svizra hai dà ferms urizis la notg passada, sper vents cun fermezza d'orcan hai dà tenor SRF Meteo radund 1'700 chametgs durant la notg. L'urizi haja chaschunà interrupziuns dal current u impediments da traffic. Cunzunt pertutgadas sajan stadas regiuns da la Svizra Occidentala e da la Svizra dal Nordvest.
Ils provediders d’energia han annunzià incaps en il nord da Bienna ed en il vest da Moutier en il chantun Berna. Plinavant er en parts da Basilea-Champagna e da l’Argovia. Pervi da donns da malauras hai er dà impediments tar il traffic da trens. Per exempel sin la lingia tranter Soloturn e Moutier – sco la SBB ha communitgà.
Plievgia e naiv na vegnan betg da mitigiar sitgira
La naiv e la plievgia dals ultims dis, n'han strusch mitigià la gronda sitgira che regia il mument en Svizra. Per ch'i haja in effect, duvrassi tenor l'Uffizi federal da l'ambient anc radund 30 fin 35 ulteriurs dis cun plievgia. La sitauziun saja bain sa calmada in zic a curta vista, i saja però da quinta ch'il livel da l'aua crodia en curt puspè.
Ils ultims dis haja dà 10% da quai ch'i duvrass. Ils proxims dis èsi puspè da spetgar temperaturas da fin 20 grads, uschia che l'effect saja anc pli spert davent.
