Siglir tar il cuntegn

Header

Camiuns charreschan sur il San Bernardino.
Legenda: La moziun prevesa er taxas per charrar sur il San Bernardino. Keystone
cuntegn

Svizra Viadi tras las Alps duai custar extra

La Confederaziun duai introducir ina taxa per tut las traversadas da las Alps en la rait da las vias naziunalas, quai pretenda il cusseglier naziunal verd-liberal Jürg Grossen. Sco quai ch’il «Tages-Anzeiger» rapporta, haja Grossen inoltrà ina moziun correspundenta.

Quest’idea n’è betg nova: Avant 3 onns aveva l'idea d'introducir ina taxa per la ruta dal Gottard vegnida refusada en la consultaziun. Ina maioritad dals chantuns e da las partida eran s’exprimidas cunter la taxa. Critichers temevan ch’i vegnia uschia svià sur il Simplon ed il San Bernardino.

Sustegn da tut las partidas

Cun extender l’idea da la taxa, crescha il sustegn però. Tant politichers da la PBD, la PCD, la PLD e la PPS han suttascrit la moziun da Grossen. Quest sistem da taxas duai la finala evità che las traversadas svizras da las Alps attirian dapli traffic.

Mainis dividids tar exponents grischuns

Jon Pult il president da la PS grischuna e fervent adversari dal segund tunnel dal Gottard beneventa l'idea e ch'i vegn discuttà davart ina tala taxa.

Pli sceptic vesa cusseglier dals stans e commember da la cumissiun da traffic, Stefan Engler, l'entira chaussa. Per el purtass in sistem da taxas memia bleras dumondas che fissan da sclerir sco p. ex. tgè far cun ils vaschins da la Mesolcina che charreschan mintga di tras il tunnel dal San Bernardino.

Medemamain adversari da l'idea da taxas è cusseglier guvernativ Mario Cavigelli. Per el è il sistem existent che finanziescha e reglescha il traffic, er quel da transit, tras la vignetta e l'uschènumnada «LSVA» megliers ch'in sistem da taxa. Quel fiss malgist perquai ch'ins stuvess pajar be per ils tunnels en la muntogna e betg per quels en la Bassa. Plinavant patiss tenor Mario Cavigelli er il turissem dad ina tala taxa.

RR novitads 06:00

Artitgels legids il pli savens

Ir a sanester Ir a dretg