Siglir tar il cuntegn

Header

cuntegn

Viafier federala SBB quinta er proxim onn cun perdita

La Viafier federala SBB resta er l'onn che vegn en la perdita. Cun plirs tschient milliuns deficit quinta il schef da la SBB Vincent Ducrot, sco el ha dit a las gasettas da CH-Media.

Dentant na duess la perdita da l'onn proxim betg pli esser uschè auta sco quest onn, haja Ducrot accentuà. Per quest onn quinta el cun ina perdita d'enturn 600 milliuns francs. Tut en tut vegnia la crisa da corona a custar la SBB net radund duas milliardas francs. En radund 3 fin 4 onns vul la SBB puspè esser circa sin il stan d'avant la crisa.

Dapli effizienza

Malgrà questa summa na vul la SBB dentant betg dauzar las tariffas. Quai fiss deplazzà, manegià Ducrot. Ma il manaschi stoppia vegnir pli effizient ed ins veglia spargnar custs, ha el declerà. Er tar la clientella che haja abunaments generals è Ducrot optimistic. El è da l'avis ch'ils radund 10% u 45'000 abunaments che na sajan quest onn betg vegnids prolungads, vegnian en avegnir puspè a turnar.

Er da relaschar persunal na saja tenor Ducrot betg in'opziun per spargnar. Quai na saja nagin tema. Els hajan dentant avunda fluctuaziun per pudair stritgar plazzas, nua ch'i saja necessari. La SBB veglia dauzar il dumber da persunal en la sparta operativa, ma franar tar l'administraziun.

RTR novitads 06:00

Artitgels legids il pli savens