Siglir tar il cuntegn

Header

cuntegn

Svizra Viafiers duain spargnar energia

Il Cussegl federal ha decidì da quintar il consum d'energia effectiv e betg pli pauschalas a partir dal 2020. Las viafiers che vulan restar tar il sistem da pauschalas ston pajar a partir dal 2020 25% dapli.

Tenor la regenza svizra n'è il sistem actual cun las pauschalas betg optimal cunquai ch'el na correspundia betg al consum effectiv. Tar il medem tip da tren e sin il medem traject po il consum sa differenziar per fin 40%, tut tenor aura e cumportament da charrar.

Perquai ch'i vegn da bun pervi da la midada dapli daners a l'infrastructura è la finamira dal Cussegl federal da sbassar il pretsch per ura kilowatt per 2%. Da quai profiteschan lura quellas viafiers che mesiran il consum effectiv. Spargnar il pli bler pudess tenor la Confederaziun uschia in tren da rauba che charrescha tschintg giadas ad emna tras la Svizra, numnadamain 75'000 francs ad onn.

Viafier retica betg pertutgada da la midada

Els hajan in agen sistem da quint cun la Repower sco lur furnitur d'energia, ha ditg la pledadra da la Viafier retica, Yvonne Dünser sin dumonda. I vegnia quintà sin basa da mesiraziuns ch'els han fatg cun tut las locomotivas e sin tut ils tschancuns. Uschia possia vegnir quintà l'energia ch'in tren dovria per kilometer sin in tschert tschancun.

RR novitads 15:00 +

Artitgels legids il pli savens