Las Viafiers federalas (SBB) nodan per l'emprima giada dapi trais onns puspè in gudogn. Grazia al grond dumber da passagiers, saja sa resultà in gudogn da 267 milliuns francs l'onn passà, scrivan las Viafiers federalas. En tut han las Viafiers federalas transportà il 2023 mintga di en media 1,32 milliuns passagiers.
Debits restan gronds
Il gudogn da l'onn passà na bastia però betg per sbassar decisivamain ils debits, scrivan las Viafiers federalas plinavant. La SBB ha anc debits da 11,26 milliardas francs. Ed era las perditas dals onns avant na sa laschian betg cuvrir. Plinavant na possian las Viafiers federalas betg finanziar las investiziuns en l'avegnir. Tar quellas tutgan tranter auter investiziuns en vaguns e locomotivas.
Dumber da passagiers cuntanscha dumber da record
Cun ils 1,32 milliuns passagiers per di l'onn 2023 han las Viafiers federalas puspè cuntanschì il nivel da l'onn da record 2019. L'onn 2022 aveva la SBB transportà be 1,16 milliuns passagiers per di.