Las Viafiers federalas svizras (SBB) han gì da cumbatter glindesdi en damaun cun in disturbi tecnic tar la vendita da bigliets. Da cumprar bigliets vi dad automats, via app u pagina d'internet n'è ad interim betg stà pussaivel. L'offerta dad Easyride n'è betg stada pertutgada. Curt avant las 10 saja il disturbi stà eliminà ed ins possia puspè far diever da tut las offertas per la vendita da bigliets. Quai ha ditg ina pledadra da l'SBB sin dumonda da l'agentura da novitads Keystone-SDA.
Il motiv dal problem saja stà in disturbi tecnic. Ils automats da bigliets da l'SBB a las staziuns han mussà glindesdi en damaun l'annunzia da disturbi «La prestaziun pajada na po betg vegnir distribuida». Il portal d'internet Blick.ch aveva rapportà l'emprim sur dal disturbi. Er en l'app da l'SBB n'ha la vendita da bigliets betg funcziunà, in'annunzia d'in sbagl è vegnida inditgada. Per consultar la pagina d'internet da l'SBB è cumparida ultra da quai la remartga: «Pervi da problems tecnics èsi actualmain pussaivel da cumprar bigliets via SBB.ch e via SBB Mobile mo cun restricziuns.»
