Siglir tar il cuntegn

Header

Logo da las Viafiers federalas
Legenda: Keystone
cuntegn

Viafiers federalas Transportà tants passagiers sco anc mai

Las Viafiers federalas han transportà l'onn passà uschè blers persunas sco anc mai. Cun 1,3 milliuns passagiers mintga di è il dumber creschì per 6% cumpareglià cun l'onn avant, communitgescha la SBB. Cun 463 milliuns francs è il resultat da concern però sa reducì per 18,5%. Quai malgrà che la SBB ha vendì 15% dapli bigliets che l'onn avant. S'augmentà è er la vendita d'abunaments generals e da mesa taxa.

Durant il medem temp èn però damain trens da la SBB arrivads a temp. Raschuns sajan ch'i vegnia transportà dapli passagiers aifer in stretg urari, blers plazzals da lavur u memia pauc persunal e trens. Per augmentar la punctualitad vul la SBB stgaffir dapli reservas en il sistem, e meglierar l'infurmaziun dals clients.

Bigliets da spargn fan effect

La strategia da las Viafiers federalas cun vender bigliets da spargn pli bunmartgads mussan in effect positiv sin l'occupaziun dals trens. L'onn passà hajan uschia radund 1,5 milliuns clients midà da trens surchargiads sin tals cun ina pitschna occupaziun, communitgescha la SBB.

Tut en tut ha la SBB vendì passa 8,8 milliuns bigliets da spargn, uschè blers sco anc mai dapi ch'ins ha introducì il sistem avant 3 onns. Per quest onn vul la viafier metter a disposiziun tals bigliets da spargn per 100 milliuns francs.

RTR novitads 12:00

Artitgels legì il pli savens

Nach links scrollen Nach rechts scrollen