En l'avegnir na duai ins betg pli stuair reservar per pudair transportar il velo cun il tren. 14 organisaziuns han surdà a las viafiers federalas ina petiziun cun passa 54'000 suttascripziuns. Ellas argumenteschan ch'in obligatori da reservar fetschia pli char e pli cumplitga da prender cun il velo.
La SBB di ch'ella sa stentia da porscher dapli plaz per velos, ma ch'i dovria in obligatori da reservar per pudair dar damogn a la gronda dumonda. In'obligaziun da reservar vala per trens inter-city da la SBB dapi la fin da mars. La pandemia da corona haja numnadamain chaschunà in boom nua ch'ins haja per part betg pudì pigliar cun tut ils velos durant dis cun bleras frequenzas. In obligarori dettia qua segirezza da planisar, perquai hajan ins introducì quel.
Per l'onn 2021 haja la SBB schlargià la purschida da plaz entaifer curt temp sin 4'000 plazs da reservar. Sin trajects frequentads bain, hajan ins uss radund trais giadas dapli plazs a disposiziun per velos. Plinavant veglian ins stgaffir anc dapli plaz per velos en ils trens. Ma, ils auters viandants na possian betg ir en emblidanza.
Ord l'archiv: