Siglir tar il cuntegn

Svizra Vias da velo augmentan la segirtad per tuts

Ina buna rait da vias da velos en Svizra gidia d'evitar accidents. Da quai è la cussegliera federala Doris Leuthard persvadida. A Berna ha ella preschentà ils arguments per l'artitgel constituziunal da velo, davart il qual nus avain da decider la fin da settember.

Legende: Video Tgi enconuscha las reglas d'ir cun velo? abspielen. Laufzeit 2:05 Minuten.
Or da Actualitad video dals 02.07.2018.

Là nua ch'il traffic saja separà, dettia pli paucs conflicts tranter autos, velos e peduns. Vias da velo augmentian pia la segirtad per tuts. Uschia ha la cussegliera federala argumentà oz a Berna per l'artitgel constituziunal dal velo. Adina dapli persunas giajan cun velo e perquai saja quest artitgel impurtant.

Dus terzs da las chasadas en Svizra possedian oz almain in velo. E quels na vegnian betg sulettamain duvrads en il temp liber, mabain adina dapli era per il mintgadi – per exempel per ir a scola ubain a la lavur. Il boom dals e-bikes accelereschia anc quest trend, uschia Leuthard.

Cuntraproposta a l'iniziativa da velo

L'artitgel constituziunal è la cuntraproposta directa a l'iniziativa da velo ch'è vegnida retratga. Lezza vuleva obligar la Confederaziun da promover las vias da velo. L'artitgel davart il qual nus votain il settember è pli modest. El dat sulettamain la pussaivladad a la Confederaziun da promover tals projects da chantuns e vischnancas.

Naginas novas subvenziuns

Cun l’artitgel constituziunal na vegnia betg creà in nov instrument da subvenziuns. Gratuit n’è el dentant tuttina betg. La Confederaziun quinta cun custs supplementars da circa 1,8 milliuns francs e cun in basegn da persunal da 1,5 plazzas.

RR novitads 12:00