Tar il sboz sa tracti dad ina nova lescha. E quella prevesa che kinos, commerziants online e plattafurmas sco Youtube vegnan obligadas da nudar cleramain limitas da vegliadetgna. Latiers duai la lescha er reglar las mesiras che valan per controllar la vegliadetgna e tgi ch'è responsabel per la realisaziun, la surveglianza e la coordinaziun da quellas.
Medemas reglas en l'entira Svizra
Uffants e giuvenils possian consumar persuls videos e games sin divers chanals e la protecziun dals uffants saja perquai ina chaussa anc pli brisanta, ha argumentà la cussegliera grischuna Sandra Locher Benguerel. A la situaziun dad ozendi na correspundia la regulaziun actuala insumma betg. La nova lescha satisfetschia perquai ad in basegn. Actualmain è la protecziun dals giuvenils numnadamain anc chaussa dals chantuns. Cun la nova lescha duajan uschia valair en l'entira Svizra las medemas reglas.
Betg survegliar ils geniturs
Da la vart burgaisa hai dentant dà resistenza. Las branschas correspundentas sajan gia daditg vegnidas activas, ha argumentà Verena Herzog da la PPS da la Turgovia. I na dovria nagina regulaziun inutila ed i na fetschia betg da basegn da survegliar ils geniturs.
Ina debatta da detagl n'hai la mesemna pervi da mancanza da temp dentant betg pli dà en il Cussegl naziunal. Quella duai suandar en ina da las proximas sessiuns.
