Siglir tar il cuntegn

Svizra Vincenz: «Arrest d'inquisiziun na-necessari e betg commensurà»

Suenter che l'anteriur schef da la Raiffeisen Pierin Vincenz è puspè liber, piglia el posiziun e crititgescha las mesiras cunter el. L'arrest d'inquisiziun saja stà nunnecessari e total na-commensurà.

Legende: Video Pierin VIncenz è puspè liber abspielen. Laufzeit 2:16 Minuten.
Or da Telesguard dals 13.06.2018.

Quai ch'el haja stuì subir las ultimas emnas na giavischia el a nagin, ha Pierin Vincenz laschà communitgar via in'agentura da communicaziun. Tenor las circumstanzas giaja quai bain cun el, ed el engrazia a tuttas e tuts che l'hajan sustegnì en quest grev temp.

Jau ma sent bain – tenor las circumstanzas. Jau engraziel a tuttas e tuts ch'èn loials e ma sustegnan durant quest grev temp.
Autur: Pierin VincenzAnteriur schef banca Raiffeisen svizra

Il fatg ch'ins haja instradà ina procedura cunter el saja stà ina surpraisa, declera Pierin Vincenz vinavant. Na-necessari e na-commensurà saja stà l'arrest d'inquisiziun, di Vincenz, perquai che las transacziuns discutadas sajan gia veglias e documentadas fitg bain. Vincenz ha era repetì e punctuà ch'el renviescha tut las inculpaziuns en il rom da la procedura cunter el, e vegnia a sa dustar cun tut ils meds a disposiziun.

Jau renviesch anc adina las inculpaziuns en il rom da la procedura penala cunter mai, e vegn a ma dustar cun tut ils meds a disposiziun.
Autur: Pierin VincenzAnteriur schef banca Raiffeisen svizra

Vincenz era vegni arrestà la fin da favrer e seseva dapi lura en arrest d'inquisiziun – tranter auter pervi da suspect da gestiun malfidaivla en connex cun l'administraziun fiduziaria. Inculpaziuns che Pierin Vincenz sez ha adina dementì detschartamain.

Libertad cun cundiziuns «remplazzantas»

La procura publica suprema da Turitg ha dà enconuschent che l'anteriur partenari da fatschenta da Vincenz tar la societad da cartas da credit Aduno saja era liber. Las inquisiziuns sajan progredidas bain – e perquai dastgian els esser libers cun «differentas cundiziuns che remplazzan l'arrest». Pli concret n'ha la procura publica betg descrit las cundiziuns. Las inquisiziuns cunter tut las persunas inculpadas marschian vinavant.

RR novitads 06:00

Recapitulaziun

  • Finma investighescha transacziuns da Aduno e Raiffeisen, nua che Pierin Vincenz gioga ina rolla (tar Aduno sco president dal Cussegl d'administraziun, tar Raiffeisen sco CEO). Da sclerir: Sch'i ha dà in cunflict d'interess ubain schizunt donns, cura che Raiffeisen ha cumprà Aduno.
  • December 2017: Finma sistescha la procedura cunter Pierin Vincenz, suenter che lez è sa retratg da tut las funcziuns da manar tar la Helvetia.
  • December 2017: Aduna e Raiffeisen fan denunzia penala cunter Pierin Vincenz ed in'ulteriur commember dal cussegl d'administraziun.
  • 25-01-2018: Vincenz desista dal presidi en il Cussegl d'administraziun da la Repower.
  • 27-02-2018: La polizia interroghescha Pierin Vincenz e fa perquisiziuns en pliras chasas. La procedura marscha cunter Vincenz e 4 ulteriuras persunas.
  • 3-3-2018: Pierin Vincenz vegn en arrest d'inquisiziun.
  • 16-5-2018: Dretgira prolunghescha arrest d'inquisiziun.
  • 12-6-2018: Procura publica lascha liber Pierin Vincenz cun cundiziuns. Las inquisiziuns continueschan.