Curt avant ch'il termin intern per annunziar las candidaturas è scadì ha la cussegliera naziunala dal chantun Vallais Viola Amherd communitgà ch'ella giaja en la cursa per il sez da la PCD. La Vallesana da 56 onns vala dapi la demissiun da cussegliera federala Doris Leuthard sco favurita.
Dapi il 2005 en il cussegl naziunal
Dapi il 2005 sesa Viola Amherd per il chantun Vallais en il cussegl naziunal. L'advocata è commembra da la cumissiun per traffic e telecommunicaziun sco er da la cumissiun per dumondas da dretg. Plinavant è ella dapi il 2011 vicepresidenta da la fracziun cristiandemocratica en Chasa federala.
Runda da quatter candidatas e candidats
La Vallesana è la quarta en la runda cristiandemocratica ch'ha interess da succeder a Doris Leuthard. Sper Amherd han er la cussegliera naziunala Elisabeth Schneider-Schneiter, il cusseglier dals stadis dal chantun Zug Peter Hegglin sco er Heidi Z'graggen, cussegliera guvernativa dal chantun Uri annunzià interess. Las elecziuns han lieu ils 5 da december.
Operaziun ha fatg in stritg tras ils quints
Viola Amherd ha gia vulì annunziar sia candidatura avant bun 10 dis. Lura avevan crappa dals gnirunchels dentant fatg in stritg tras ils quints da la cussegliera naziunala. Dumengia saira ha ella stuì vegnir operada.
RR novitads 15:00
