- La Cumissiun naziunala per la prevenziun da la tortura (NKVF) è preoccupada pervia da la situaziun dals uffants e da las famiglias. Ella dumonda per ina meglieraziun en tut ils trais centers en il chantun Berna.
- L'NKVF ha cumponì per incumbensa dal la direcziun da la polizia bernaisa in rapport davart la situaziun en ils centers da repatriament ad Aarwangen, Biel e Gampelen.
- En centers da repatriament vegnian plazzadas requirentas e requirents d'asil che han survegni ina decisiun da refusa davart l'asil. Els n'han nagina permissiun da dimora en Svizra e ston partir a l'exteriur.
Tenor la cumissiun na sajan las cundiziuns da viver en ils centers betg cumpatibels cun la convenziun dals dretgs dals uffants da l’ONU. Concret violescha la situaziun actuala il dretg dals uffants da viver sut cundiziuns adequatas, il dretg sin ruaus e temp liber sco era la pussaivladad da termagliar e pudair sa revegnir.
Famiglias pateschan
Cunzunt per famiglias èn las cundiziuns en ils centers da repatriament difficilas. Quellas na sa sentian era betg segiras, oravant tut durant la notg. Las tualettas e las duschas n'èn betg separadas en tut ils centers per umens e dunnas u era betg protegidas avunda.
Uschia reagescha il chantun Berna
Là nua ch'i è raschunaivel e nua che la cumpetenza permetta vegnia la regenza a procurar per meglierament, ha annunzià il chantun. Ch'ils dretgs dals uffants vegnian violads na laschan las autoritads bernaisas dentant betg valair.
