Mesiras cunter fans violents duain vegnir mess en pratica anc pli rigurusamain. Quai han la ministra da sport, Viola Amherd, e represchentants dal ballape concludì il glindesdi tar in inscunter a Berna.
La cussegliera federala Amherd ha latiers proponì trais accents:
- Sch'i vegnia constatà, ch'in fan na sa tegnia betg vi da las reglas dal stadion, lura stoppia quel per immediat survegnir in scumond da stadion. I na dovria nagina sentenza dad in tribunal per quai.
- La collavuraziun tranter ils clubs e la polizia u las autoritads duai vegnir meglierada per identifitgar fans violents. Latiers tutga in meglierament da la surveglianza da video en ils stadions. En pli duain ils clubs consequentamain purtar plant tar fans violents.
- Sa basond sin las experientschas en Germania duai er vegnir examinà, schebain ils clubs duain pudair dumandar ina licenza, mo sch'els han ordavant certifitgà lur process da segirezza.
A l'inscunter èn ils funcziunaris dal sport sa declerads d'accord da persequitar quests accents en lur lavur futura. Els han però pretendì ch'era chantuns e las autoritads giuridicas stoppian far sias lezias, per pudair tegnair davent fans violents dad occurenzas da sport.
RR novitads 15:00