Suenter che scolars han attatgà dus scolasts vid en ina scola superiura a Genevra ha la cussegliera guvernativa Anne Emery-Torracinta (PS) annunzià mesiras. Dus scolars da la scola pertutgada a Vernier vegnian transferids. Plinavant vul la directura da l'educaziun furmar ina Task Force.
«Las acziuns èn inacceptablas», ha la cussegliera guvernativa ditg en in'intervista cun la gasetta «La Tribune de Genève». La scola na saja nagina zona senza reglas». Ella haja piglià mesiras per proteger la magistraglia. Plinavant vegnian ins ad agir cunter ina gruppa da scolars che saja s'organisada ed haja fatg part da la violenza.
Gia dus scolasts attatgads dapi la stad
La scola superiura Renard cun uffants tranter 11 e 15 onns è tenor rapports da medias gia stada duas giadas involvida en cas da violenza, quai dapi l'ultima stad. Tenor quels saja ina scolasta vegnida blessada perquai ch'insatgi ha bittà in crap sin ella, sinaquai ha la polizia arrestà sis scolars.
Mesemna passada saja in scolast vegnì pitgà da plirs scolars en il suler da la scola. In pledader da la polizia ha confermà ch'els hajan stuì intervegnir en la scola.
Lavur da prevenziun
La directura da l'educaziun vul uss realisar ina gruppa da lavur en ses departament. Quella duai barattar experientschas da differentas scolas e discutar mesiras preventivas. Emery-Torracinta ha declerà en l'intervista che la violenza pertutgia be in pitschen dumber da scolars. Il dumber da tala violenza na saja betg s'augmentà, ma tals singuls cas da violenza vegnian adina pli extrems.
RR novitads 12:00